PAYPER NË ANDE: BOLIVIA ILLIMANI 2018

Ekspedita italo-sanmarineze ka realizuar një arritje të vërtetë!
Në korrik të 2018, dy riminezë, Massimo De Paoli dhe Davide Morini, bashkë me kolegun sanmarinez Riccardo Stacchini, kanë përjetuar një aventurë të jashtëzakonshme në Cordigliera Real në Bolivi.
 
“Ëndrra”.
Ideja, ose më mirë “ëndrra” e ngjitjes, i lindi që në gusht të 2014 Massimo De Paoli kur u mahnit nga fotografia e kreshtës veriore të Illimanit që pa në një artikull gazetaresk në internet. Në këtë artikull tregohej se një ekspeditë italiane kishte dështuar për ta ngjitur për shkak të kushteve të këqija me borë e akull.
 
Kështu De Paoli, edhe pse e konsideronte veten krejtësisht “një alpinist diletant”, ka menduar 4 vjet për atë kreshtë, duke përfshirë e bindur miqtë e tij të vjetër të përballonin një stërvitje të fortë për muaj të tërë në Alpet italiane në përgatitje për këtë arritje në Amerikën Jugore.

Etapat.
3 alpinistët mbërritën në La Paz më 18 korrik. I shoqëronte Andrea De Paoli, i biri i Massimo, që do të fotografonte dhe filmonte ekspeditën. Aty i priti një udhërrëfyes peruan për male të larta, Miguel Martinez, që i shoqëroi gjatë gjithë aventurës.
 
Bashkë u transferuan në “bazën” logjistike të Peñas, te vepra misionare në kuotë shumë të lartë e priftit–alpinist italian At Antonio Zavattarelli, mik i shumë alpinistëve që kanë kaluar nga ato anë nëpër vite. Ishte një moment i rëndësishëm për t’u mësuar me klimën, por edhe një rast për të dhënë diçka e për të mbështetur punën e këtij misionari kufitar.
 
Më 25 korrik përpjekja e kësaj ndërmarrjeje filloi në “stil alpin” rigoroz, d.m.th. duke marrë me vete gjithë sa nevojitej në çantën e shpinës, pa përgatitur më parë kampet e strehimit. Pas 2 ditësh, megjithatë, për shkak të kushteve tepër të këqija, ngaqë kishte edhe shumë borë të freskët përgjatë rrugës në akullnajë, ngjitja e kreshtës veriore u bë praktikisht e pamundur.
 
Prandaj grupi zbriti në kampin “Nido de Condores” në 5450 metra, që të rimerrte veten. Të nesërmen, pra më 28 korrik, riprovoi ngjitjen nga një shteg tjetër, duke arritur majën kryesore të Illimanit Jugor, në 6440 metra.
 
Kështu, skuadra italo-sanmarineze edhe pse veç sa iu afrua objektivit fillestar, realizoi megjithatë një arritje të shkëlqyer!